Eftir ráðstefnuna Suðurland bragðast best, sem VSSV stóð fyrir í byrjun árs, tók hópur fólks úr ferðaþjónustuinni sig saman og stofnaði matarklasa. Markmið klasans er að leggja grunn að sameiginlegri markaðssetningu á mati úr héraði. Þetta er fólk allstaða að af Suðurlandi frá Klaustri að Hellisheiði sem á það sameiginlegt að selja ferðafólki mat í einu eða öðru formi.

Klasinn gerði það að markmiði sínu að fá til liðs við sig eins marga og mögulegt er af þeim sem framleiða og framreiða mat á Suðurlandi, búa til sameiginlegt lógó og gæðastaðal fyrir þá sem það nota.

Hugmyndin að verkefninu á rætur sínar að rekja norður í Skagafjörð þar sem verkefnið Matarkista Skagafjarðar hefur verið rekið síðastliðin fjögur ár. Markmiðið þess verkefnis:
 
,,er að leita leiða til þess að þróa matarferðaþjónustu (culinary tourism) í dreifbýli á Íslandi. Mótaðar verða aðferðir til að vinna að markvissri vöruþróun sem byggja á svæðisbundnum auðlindum á sviði matarhefða og matvælaframleiðslu. Skagafjörður er tekinn fyrir sem tilraunasvæði, en markmiðið er að síðar verði hægt að yfirfæra aðferðina víðar á landinu." (heimild)

Suðurland sem svæði mun sækjast eftir að fá að nota lógó Matarkistunnar með tilheyrandi staðfærslu og þannig halda áfram þeirri vinnu sem hafin er við að þróa og kynna hina íslensku matarmenningu með áherslu á svæðisbundinn mismun. Matarferðaþjónusta er vaxandi grein í heiminum og bíður upp á mörg tækifæri. Það verður gaman að fylgjast áfram með framgangi klasans.